Ang Pag-ibig ni Pepe sa Panahong Kasalukuyan

Ikatlong Yugto.

Hindi ko alam kung anong nakain ko at naging papansin ako sa kanya hanggang isang araw, sinabi ko na lang sa kanya na crush ko siya. Ang hindi ko alam, e crush din niya ko. Jackpot! Ito na ata yung tinatawag nilang girlfriend!

Dahil first time ko, ito na siguro ang pinaka exciting at nakakakilig. Yung tipong magkadikit lang kamay niyo parang sasabog na yung dibdib mo sa di malamang kadahilanan. Yung sa tuwing dadaan siya e mapapasulyap ka talaga at mapapangiti (ikaw nang makasilay! :D)

Natuto ako magsulat ng love letter, mag dedicate ng kanta, mag drawing, basta lahat ng pagpapaimpress na pwede kong gawin, ginawa ko na. Iba yung kilig pag first time.

Nung minsan nagusap kami,

"Pepe, anong gusto mong tawagan natin?" tanong ni Segunda.

Dahil first time namin to parehas, hindi ko alam para san yung tawagan o term of endearment ika nga.

"Ikaw, ano ba ang gusto mo?" tanong kong pabalik sa kanya.

"Alam mo ba yung Westlife? May bago silang kanta. Gusto ko yung kanta na My Love."  sabi niya.

Kahit hindi ko kilala ang Westlife, pumayag na din ako. Tawagin ka ba namang "Love" eh.

Simulan nun, naging mas masaya ang experience ko ng Puppy Love. Tabi kami sa klase, sabay kumakain ng nutribun, sabay pipila para sa soup, sabay pumapasok sa Art Club, at minsan palihim na naghoholding hands yung mga kamay namin sa ilalim ng desk para di makita ni teacher. Pagsabay na lang pauwi ang di namin magawa dahil sinusundo siya ng tita niya.

FLAMES. CAMEL. HOPE. Isa na ata to sa pinaka sikat na laro na ginagawa ng mga estudyante pag wala ang kanilang guro. Nung minsan tnry namin ni Segunda ang larong to. F for Friends, L for Love, M for Marriage, E for Enemy, S for Sweetheart. Alam niyo ba kung ano ibig sabihin ng CAMEL at HOPE? Hindi ko na kasi matandaan. hahaha

At ayun na nga, sinubukan namin ang laro. Kung gaano ako kasaya nung mga panahon ng Puppy Love, dun naman ako nalungkot sa naging resulta ng FLAMES namin. Nag susumigaw na E for ENEMY! Sinubukan ko i-FLAMES ng paulit ulit baka sakaling iba ang lumabas. Pero wala, iba talaga magbiro ang tadhana, natapos ang Puppy Love ko gaya ng isang kandila. Kung gaano kaganda ang liyab nung simula, siya namang naupos na parang bula.